पुष्पराज सापकाेटा
श्रद्धेय प्रधानमन्त्रीज्यू,
आदरणीय नेता, तपाईंले नेतृत्व गरेको पार्टी, तपाईंको विचारधारा र तपाईंको लामो राजनीतिक यात्राले नेपाली राजनीतिमा विशेष स्थान बनाएको छ। विशेष गरी राष्ट्रवाद, राष्ट्रिय स्वाभिमान र आत्मनिर्भर नेपालको सपना देखाउँदै जनताको मन जित्नुभएको तपाईंको प्रयास उल्लेखनीय छ। तर आजको दिनमा जनताको मनमा धेरै गम्भीर चिन्ताहरू जन्मिएका छन्—र ती चिन्ताहरू तपाईंको नेतृत्वसँग प्रत्यक्ष सम्बन्धित छन्।
देशमा आज चरम बेथिति, भ्रष्टाचार, अकर्मण्यता र जवाफदेहिताको अभाव मौलाउँदै गएको यथार्थलाई नदेखेझैं गर्ने होइन, स्वीकार गरेर समाधानतर्फ अग्रसर हुनु जरुरी छ।
यसै सन्दर्भमा केही विनम्र सुझावहरू प्रस्तुत गर्न चाहन्छु:
१. ओठे बोली र व्यङ्ग्य होइन, दूरदृष्टि र समाधान आवश्यक छ।
तपाईंको भाषाशैलीले विगतमा आम जनताको ध्यान तान्यो, हाँसो ल्यायो, कहिलेकाहीँ राहत पनि दियो। तर अब देश संकटमा छ। बेरोजगारी, महँगी, भ्रष्टाचार र कुशासनको चपेटामा जनता छन्। यस्तो बेला सत्ताको सर्वोच्च पदमा बसेर व्यङ्ग्यात्मक शैलीभन्दा बढी दूरदर्शी सोच, नीति निर्माण र कार्यान्वयन अपेक्षित हुन्छ।
२. भ्रष्टाचारविरुद्ध स्पष्ट र कठोर कदम चाल्नुपर्छ।
भ्रष्टाचार अब प्रवृत्तिमा परिणत भएको छ। सरकारी कर्मचारीदेखि ठूला नेतासम्मको संलग्नता जनताको गुनासो होइन—दैनिक अनुभव बनिसकेको छ। यदि तपाईं साँच्चिकै देशको हित चाहनुहुन्छ भने, आफ्नै पार्टीभित्र, आफ्नै सरकारभित्र शुद्धिकरणको अभियान चलाउनुहोस्। नत्र तपाईंको नेतृत्वमाथि जनताको विश्वास क्रमशः खस्कँदै जानेछ।
३. युवा पुस्तालाई अवसर दिनुहोस्, पुरानै अनुहारको घुम्ती बन्द गर्नुहोस्।
नेतृत्वमा निरन्तर एउटै अनुहार र सोचको पुनरावृत्तिले जनता निराश भएका छन्। युवा पुस्ता नयाँ सोच, नयाँ ऊर्जा र विश्वदृष्टिकोणसहित अगाडि आउन चाहन्छ। तपाईंको पार्टीभित्रै वा बाहिर, ती युवाहरूलाई मौका दिएर देशलाई फाइदा पुग्न सक्छ।
४. समावेशी र दीर्घकालीन भिजन प्रस्तुत गर्नुहोस्।
नेपाल सानो देश हो, तर समृद्ध बन्ने सम्भावना विशाल छ। त्यसका लागि चाहिन्छ— सिंहदरबारमा बसेर गाली होइन, दीर्घकालीन आर्थिक नीति, शैक्षिक सुधार, सुशासन, न्याय प्रणालीको मजबूती र संस्थागत विकास। तपाईं प्रधानमन्त्री हुनुहुन्छ—हामी तपाईंबाट नेतृत्वको उदाहरण चाहन्छौं।
अन्त्यमा,
आदरणीय प्रधानमन्त्रीज्यू, तपाईंले देशलाई बनाउने सपना देखाउनुभयो—अहिले त्यो सपना बिर्सँदै अप्ठ्यारा बोलिका कारण आलोचित भइरहनुहुन्छ। अब पनि ढिला भइसकेको छैन। जनताको भावना बुझ्नुस्, आलोचना सुन्नुस्, सुधारको बाटो रोज्नुस्। तपाईंको नेतृत्वमा देशले फेरी एकपटक विश्वास गर्न सकोस् भन्ने अपेक्षा राख्दछौं।
